عماها !!

في الجو الممطر اليوم طرى على بالي تساؤل كثير اسأله لنفسي ولا أحاول أعرف اجابته ,,, في جو ماطر وأنت كنت مستقل وسيلة نقل شنو المخاطر بتكون

يالتأكيد ما كنت افكر مخاطر التنقل بقاري (( دراجة )) لأن مخاطرها راح تزلق وتقوم ما فيك إلا العافية رضوض بسيطه وتعدي

ولا طرى على بالي تكون في قطار والمطر غزير لأن كل ما تشوف سكة الحديد بتاع الأطر في الأفلام المصرية تهون من الأطر وركوبه لو في أمريكا

ولا فكرت بهذا الجو الممطر وأنا بالبحر ,, لأن عقب فيلم تايتنك صار عندي قناعه العمر مش بعزأة ,,, هااا ولا الكويتي راح يحطك على الخشبة وينقذك ,,هين جان ما يحطج ويحط الخشبة فوقج وينقذ روحه ,,,

ايه اهنيه العله الطيارة ,,, سؤال وايد يطري على بالي أنت تكون بالطيارة والجو مطر شنو المخاطر الممكن تتعرض لها الطيارة !!!

في 1 3-7- 1990 كنت برحلة من بودابست لفيينا كانت رحلة قصيرة والطيارة صغيرة حيل يمكن فيها 40 شخص الطيران كان منخفض وكان مطر يومها والمطبات الهوائية تشيل وتشدخ ,,, لما تشوف الجو ممطر بهذة الطريقة ومطبات هوائية ,,لاا وتشوف من الشباك تحتك لوحة فنية رائعة أرض خضرة تقسيمه مرتبة ما يبين فيها إلا نياشين القبور حتى مقابرهم غير ,,, اهنيه تحس بقيمة سفينة الصحراء ؟؟

وإلا عاد شوف حالك أذا كنت خالص أجازتك ومقضي راس السنة بلندن وراحع هيثرو بتركب الطيارة وترجع الكويت وأنت رايح صوب الجيت للبريطانية وتشوف الجو مطر هذة اللحظة كفيلة تنسيك راسك وين قضيته ,,,؟؟

اليوم وأنا أشوف المطر طرى نفس التساؤل اللي ما أبي له جواب طيارة تطير وجو ممطر هل كيف ؟؟؟

وأنا قاعدة أفكر بهذا الأمر موبايلي يرن ,,, وإلا صديق لي أول ما سألته بومحمد شلون الطيارة فوق بالجو والمطر ما تتعرض الطيارة لمخاطر ,, رد على بأجابة في برود قالي شوفي الله يسلمك أني من تكونين بالطيارة بإيد ربج سبحانه

رديت عليه ها يا بومحمد تبي تكحلها عميتها مره وحده