مجلس مهندي

اليوم الجو الصبح هذا جونا المعتادين عليه كل سنة من شهر مايو بس تأخر هالسنة (( من رحمت الله علينا )) حر ولواهيب والشوارع الساعة 10 الصبح زحمه و وييه الناس مقفهره والكل ماد البوز شبرين ,,,, !!! ناهيك عن الجرايد والأخبار اللي فيها و وييه نوابنا اللي الواحد فيهم حالف لا يطلع وهو مبتسم تقول منكر الأبتسامه ,,,!!
وصلت النادي واسمع 3 حريم يحجون ويسولفون عن مهند التركي اللي بمسلسل نور (( للأمانه ولا مره شفت حلقة منه )) ,, وتسألني وحده منهم ليش ما تتابعينه ,,, رديت قلتلها اتابعونه أنتوا ,,, قالت هو إيييييييييه ,,, سألتها يومنكم تتابعونه وعاجبكم وراكم يا حافظ ما صدرتوا لنا نواب مجلس أمة مهندين ,, حتى التأزيم يطلع منهم خفيف على الجبد ,,, ما لقيتوا بالكويت إلا عينات تييب الحارج ,, الغبار من كثر شاف ما عاف من عوامل التصحر الخلقيه والتعامل هج وأنحاش ,,, بصراحة ردت جواب عجبني ؟؟ قالت هذة عيناتكم من وين الناس تييب مهندين !! بصراحة صاجة ,,, رياييلنا بالكويت خاصة والخليج عامة عوامل تصحر مرسومة على الوييه وموقه وشوفت حال من غير معطيات حقيقية لهذة الأسباب ؟؟؟
والعينات كل يوم نشوفها في وييه أعضائنا ,,, وييه ما تييب العافيه ,,, جنها حرورة جبد لي شربت شئ حار الساعة وحدة الظهر وأنت بالشارع وبالزحمة ,,!!
وحش الشاشة عفوآ المجلس مسلم البراك شوقي كله بطل وكله يصارخ ويخز وأذا ما حصل أحد يخزه خز نفسه ,,, !!!
أحمد لاري تقول أحمد مظهر على النظره ,,, وإلا علي الراشد تقول شكري سرحان وبكلته ,,, و محمد الصقر اللي مو عاجبه شئ ,,, والخرافي اللي تقول ما يتذكر عنده خدود إلا لي المجلس كله إيده على خذه ويطالع ,,,, والباقي انعم واكرم !!! لا بعد ويقولون مو مشكلة إلي مددنه دور الأنعقاد إلي 20 يوليو ,,,, هو غضب من ربي تأزيم وحنه وحر ولواهيب !!!!!
والحكومة ما تعرف تدور بين هالشعب جان فيه وييه تشبه مهند وتدعمهم وتطلعهم لنا نواب ,,, ترى راح يكون أنجاز مهم ,, على الأقل تأزيم حلو يسرسح على الجبد ,,, وإلا عاجبج وصعنا كل يوم نفتح هالجرايد نشوف هالوييه المتأزمه ,,,, وأنتوا يا الشعب طلعوا مجلس مهندي ما مليتوا من مجلس مقفهري ,,, وإلا ما عندكم ,,, الظاهر ما فيه !!!!