عيايز جبلة سيتي والمرشحين !

بعد أنقطاع بمحض أرادتي من مجابل عيايز جبلة سيتي وموال الحنه والرنه ,,, قررت أني أجابلهم اليوم نزلت من شقتي لقيت الوالدة والعمه اللي تفوق الوالده 200 سنة ضوئية بالحنه قاعدين متجابلين على شاي الضحى ,, ويسولفون بسالفة ومندمجين بالطرح العدائي ,, يا جماعة الخير توقعت الحديث كان عن خدم أو حارس الشاليه أو أسعار الجمعية , بتاتآ لم يكن كذلك ,,, عيايز جبلة سيتي كانت تتناقش عن الأنتخابات و المرشحين ,, فكان الحديث عن مرشح مش عاجبهم وقالوا عنه ما لم يقله مالك في خمره ,, عيار جمبازي يا فعلته ويا تركته وهذا رأيهم في جميع الأعضاء بس اليوم الهوى مايل على العضو السابق هذا وكانوا يريدونه يسقط لا وبعد مش هينين يبون يسقطونه ,, لما أستوعبت الحجي يا جماعة الحديث كان عن مرشح في الدائرة الرابعة و عيايز جبله سيتي لا ناقة لهم ولا جمل بهذة الدائرة الوالدة تصوت بالدائرة الثانية والعمة بالدائرة الثالثة يعني حتى لو تجمعهم يطلعون الدائرة الخامسة ,, يعني يا شقران كانوا يكيدون لدائرتكم كيدا ,,, !!!

المهم عجبني الموضوع دخلت معاهم بالخط مش معقول برضو يومين ما ناجرت وحدة فيهم ,,,؟

الوالدة حست أني دخلت بالموضوع خباثه حق يراد به باطل ... الوالدة تنتمي إلي قبيلة مرشحيها بالرابعة بالرغم من أن الوالدة ما عندها نعره بتاتا ,,, بس موضوع دخلت فيه هذيان عارفه هذيان نيتها شينه ,,,, فأستخدمت تتيكات سياسية حتى تجر الموضوع للدائرة الخامسة ..؟ والعمه مالها جبد أبدآ على الدائرة الخامسة رغم أنها ما تعرف فيها إلا ناس قليلين لكن تبقي مسقط رأس القبيلة التي تنتمي لها عائلة طليق العمة وهذا بلى أبوك يا عقاب ..طبعآ مرشحين تلك الدائرة من المغضوب عليهم عند العمه ,, والله وبدأ كيد النساء وقامت تتصل العمه على جم وحده من اللي تعرفهم بالدائرة الخامسة وتحجي يا فلانه من تعطين صوتج ولا تعطينه فلان وفلان وفلان وفلان ( خلوا بالكم هذة القبيلة منزله أربع مرشحين العمه تبي تخسف فيهم كلهم ) ,,,؟ متأثره حيل في فيلم وقتلتني إمرأة ,,,! الحين الوالدة أبعدت الموضوع عن العضو اللي ينتمي إلي قبيلتها ,,, وطبعآ العمه ما راحت صوب القبيلة التي تنتمي لها راحت صوب كل من يحمل مثل أسم الطليق ,,, وعرفت أمي شلون ترد لي الصاع صاعين ,, العمه ما أخسفت بالمرشحين بس العمه شالت وحطت بكل القبيله ( القلب ما زال مجروح وإلا أشعندها عمتي على أفلام نجاة الصغيرة ومديحة يسري و روتانا زمان ) ...! والوالدة مبسوطة ,, يا جماعة عدى الوقت وأنا اتنهد واتحلطم ما فيه فايده ,, أبي العمه تسكت ( بالعه لسان طير ) .. خلاص ما بدهاش على قولة أخوانه المصريين سكتناله دخل بحماره ( القبيلة التي هيضت مواجع قلب العمه وأخسفت فيهم بالحجي خوال الوالد ) وأنا علاقتي بخوال الوالد أكثر من خوالي ...؟ حلفت ما أعديها عليهم عيايز عووووووووب جبلة سيتي !!! العمه سهل تسكتها بس لأ أبي أرفع ضغطها شوي ؟؟ بديت بالوالدة اتصلت على المرشح اللي بالدائرة الرابعة سلمنا على بعض وسولفنا شوي بالأنتخابات ,, جان أقوله يا فلان البارحه خالي يسولف يقول وضعك صعب ناس وايد زعلانين عليك وما راح يعطونك صوت حتى خالي وجماعته ( الوالدة قام ويها يعطي ألوان ) المهم المرشح صدق والله المهم اتفقت معاه أني أتأكد وأكلمه مره ثانيه ,,, أنا ما أسمع من أمي إلا كلمة الله يغربلج فشلتينا مع الريال .. حقرتها ألتفت على نجاة الصغيرة عفوآ العمه قلتلها تعالي يقولون فلان تزوج ( فلان طليقها ) عمتي الأملاح اللي تعاني منها بريلها اوصلت مخها ؟ بلهجه جبلاوية فيها الحره والويل ( سلال يسله منو بياخذه هذا أنا عفته عوع ما أبيه محد يتحمله ) يا جماعه الريال منصب ومزيون وما فيه شئ بس من يقول جام عمتي هالحجي ,, المهم نص ساعه كافيه كل وحده فيهم تنحمس من الحره ,, دقيت على المرشح اللي قلتله خالي مش معطيك وتكلمت معاه وبيني وبينه ميانه وعرف أني قاعدة أضغط بالوالدة ( طبعآ موال المرشح لا الوالده هي رأس المال وبلا وبلا المرشح محتاج أصوات عن طريق أهل الوالدة وبرضو فيه أصوات من خوال الوالد ) بعدها ألتفت على العمه وقلتها ترى فلان ما تزوج سمعت منها صوت من القلب طالع الله يلعنج ( ومن الحب ما قتل ) !! ,, قلتلهم شوفوا عيايز جبله سيتي راس مالكم جنسيتين أنتوا شكوا بتنجحون وتسقطون ,, ترى أن سمعتكم اتحجون مره ثانيه بالأنتخابات ولا مع شينهم قوات عينهم ضد ( توجهي ) أتصل على وزير الداخلية وأقوله يبي يبيعون أصواتهم !!! يا ناس ما بغيت إلا عمري وحده ترفع والثانية تجبس بصوت واحد ,, مالت عليهم أنشالله محد فيهم ينجح ولا واحد من هالمرشحين ينجح شنو سووا للديرة كلهم عيايره ,, عسى محد يوصل فيهم للمجلس ومحنا مصوتين لحد فيهم وجناسينا بالتجوري محنا مطلعينها .. جان تقول العمه للوالده أمشي نروح من الحين مصر أشحقه قاعدين ,, حق الغثى والمناجر ( الغثى أنا ترى ) وترد العمه بتحلطم آخر .. ما قلتلج وكان كلامها موجه للوالده خلينا نرتب حياتنا نروح نقعد شهر ونص بمصر ونطلع على لبنان وإيطاليا ولندن ونرجع نص شهر 8 عشان نرتب حق رمضان ( اهاااا نرتب حياتنا هذه سامعنها من روتانا زمان العمه ) ,,, وخليهم اهم وأنتخاباتهم يا نار شبي بحط !!!

ويا حافظ بغيناها طرب صارت نشب الحين بسكتهم ماني قادره أبي أفك روحي من الحنه ,, عصبت عليهم ( الزين فيهم يحترمون عصبيتي ) قلتلهم شوفوا أنا بصعد شقتي يومين ما أبي أشوفكم ولا أحد يحاجيني كيفي بازعل زين ؟؟؟

صعدت شقتي ما طاف 10 دقايق وإلا الموبايل يرن العمه متصله رديت عليها وأنا زعلانه بدأت تحجي ها اشقاعده تسوين من كلمتي من دق عليج ,,, يلا تعالي قعدني معانا تحت !!!

بالله الواحد شيقول عدو عيني يكون محور شاي ضحاهم !