شفت الهوايل بحلم القوايل !!!

ما أحب نومة الظهر ولا متعودة عليها أصدفت اليوم عندي ,,, نمت الظهر جان أشوف ذاك الحلم اللي ما شفته من قبل ولا شافه أحد قبلي ....
حلمت جنه رن تلفوني وإلا بشخص مسؤول بالدولة سلمنا علي بعض وبدأ الحديث بينا عن أوضاع الأنتخابات التي قاعدين نعيشها شوي حمى وطيس الحديث ... فقررنا أن نتقابل بعد ساعة ونص في صالة أسهم تداول الأوضاع ,,, رحت المشوار كأي كويتي مو عاجبته الزحمة والشوارع ولا شئ عاجبه ,,,,وصلت الصالة سلمت على المسؤول وقعدنا نسولف بالأوضاع وحل المجلس والحكومة والشعب ,,, طبعآ شال الحديث سخونه الوضع وعساره معهودة في شخصيتنا من زمان وبعد هالحجي حاولنا نشوف حل مناسب للوضع,,,, ال 5 دوائر كأنك يا بوزيد ما غزيت فزعة على كل صوب القبيلة والتيار والمذهب ولا والعقول بعد تفزع ,,,,,, طيب أعلان أحزاب بالوقت الحالي ,, لا أكيد الشعب راح يزيد تحلطم وعسارة وبروحه هالأيام قاعد نشوفه مع دخلت الحر الشعب الكويتي مو طايق روحه ,,,,,,, راح حديث ويا كلام وآخرتها توصلنا إلي منظومة جديدة تساند النسيج الأجتماعي ونفتك من معاير الشعب للشعب ومعاير الشعب وتحلطمه على حكومة بعد حيلي شفنا ما يلي :-
لو الحكومة تروح الصين وتروح تشترى شعب والله 300 ألف صيني ما يطلعون 3 مليون دينار عشان أذا لهى الشعب بالتحلطم والأنتخابات والأصلاح الشعب الصيني يسد الحاجة أكيد لازم تتصرف الحكومة بالأسماء برضو مافيها مشكلة
1- شيغ منغ ناساوتنسي زمخشري
2- لوان يوان هوان قبلي
3-سلوق بلوق خضير
4- بلينغ تلينغ ملينغ آغا
5-ونهان بوان شو قبلي
6-كوان بستال فستق
وبالنسبة للشعب الموجود اللي تشوف ما حط الكويت قبل القبيلة ولا دجلة ولا المذهب ولا الملة ,,, لا وبعد مزعج
بايقيلونه بايطلبون منه يستقيل , وكل واحد يشوف الكويت مش بالمرتبة الأولى بالفعل مش بالمهايط يرد حق الشركة اللي موردته :-
أولا : اللي يرد حق النخل وبعارين جدة ونجد وضواحيها ؟
ثانيآ : اللي يرد لبلاد الرافدين ويطلع العثمانية
ثالثآ : شيراز وتهران وقم ويزرع الفستق ويطبخ الآش
رابعآ : اليمن وزنجبار ويرد لرمحه ودرعه الجلدي
وما يقعد بالكويت إلا اللي يشوف أن الكويت ومصلحتها فوق كل أعتبار وفوق كل قبيلة ومذهب وتيار
ترى أول أهل السور جم واحد ويا زينهم وما عندهم معاير ولا تحلطم ,,,,,,,,,اليوم اللي وصل من الزلفي صار له 40 سنة صار من اهل السور ,,,, واللي وصل من الناصرية ما عاد إيله 60 سنة صار من أهل السور,,,,,,, واللي وصل من شيراز صار 60 سنة من أهل السور ,,,,,,,واللي وصل من عدن صار له 50 سنة من اهل السور ,,,,
وبلحظة حمى النقاش جان أفز من النوم ؟
بس جني شفت شئ ما عجبي صار الشعب كله من داخل السور عفيا سور يكفي مليون مواطن وتحلطمهم واصلاحهم ومعايرهم ؟
صحيح بحلم القوايل تشوف الهوايل
أقول قبل لا أحد يتحلطم علينا تراه حلم حلم والحلم ماله تحريم ولا مواد تجرمه بالدستور !!!!